isip-bata.deviantart.com/art/m…Walang tunay na edukasyon na nagaganap sa kasalukuyang sistema ng edukasyon. Nararanasan at itinuturo lamang sa atin ang isang sistemang kolonyalisado, komersyalisado at pasista. Isang huwad na edukasyon na nagsisilbi lamang para sa makitid na interes ng iilan.
Kolonyalisado para sa interes ng mga dayuhan. Itinuturo sa atin na hamakin ang sariling lahi at gawing ‘panginoon’ ang mga dayuhan para sila ay pagsilbihan at tuluyan na tayong magpaalipin sa kanilang interes. Mula “A is for apple” hanggang sa mga kurikulum na naglalayong gawin tayong “Globally competitive” ay ninanakawan na tayo ng mga matatalinong mamamayan na siya sanang nagpapaunlad sa ating bansa.
Komersyalisado para magkamal ng malaking tubo mula sa paghihirap natin para makamit ang pangakong kaledad na edukasyon. Ginagatasan ang ating butas nang bulsa sa pamamagitan ng matrikula at mga bayarin habang nilalaan naman ng gubyerno ang taunang budget para sa pambayad interes sa mga utang panlabas at militarisasyon. Pinahihirapan tayo taon taon upang maging indibidwalista at kalimutan ang mas malawak na interes at pangangailangan ng masang Pilipino.
Pasista para mabusalan ang pag-gigiit ng demokratikong karapatan, para labanan ang lahat ng pagtutol at takutin ang sino mang nais ng tunay na kalayaan sa pagkatuto. Sistematikong pinapatay ng administrasyon ang mga progresibong mga pwersa upang manaig ang kanilang interes at makapanatili sa poder. Tinuturuan tayong maging kimi at bulag sa kawalang katarungan, sunud-sunuran sa kagustuhan at pamamalakad imbes na mapaunlad at mapayabong ang pagkatuto at sa praktika nito.
Ang gusto ng administrasyon ay mag-aral lamang tayo. Busal ang bibig at piring ang mata sa reyalidad ng lipunan. Hinihiwalay sa kalagayan at pakikibaka ng masang api at pinagsasamantalahan upang magsilbi para sa interes ng iilang naghaharing uri.
Magkakaroon lamang ng tunay na edukasyon sa pagsusulong ng sistemang makabayan, makamasa at siyentipiko. Ang tunay na pagkatuto ay ang nakabase sa pagpapaunlad ng bansa na nakatuon sa interes ng malawak na masa at para sa siyentipikong pag-tuloy tuloy ng pag unlad.
Maigigiit lamang ang edukasyong ito sa pagsanib ng kabataang estudyante sa pakikibaka ng masang api para isulong ang Pambansang Demokrasya. Dahil hindi kailan man maihihiwalay ang edukasyon sa tunay na nagaganap sa lipunan.
Tagumpay sa sama-samang pagkilos!
Isulong ang maka-masa, siyentipiko at makabayang edukasyon!